“Mjerë gjuha shqipe ç’i punojnë e s’ka gjuhë të ankohet”

Gjuha është një ndër simbolet më të rëndësishme të një kombi. Ajo përcakton identitetin dhe mbart në vetvete historinë dhe kulturën e tij.

Gjuha shqipe, edhe pse e dokumentuar mjaft vonë, është një ndër gjuhët më të lashta të Ballkanit. Lufta kundër gjuhës shqipe ka qenë e ashpër, e egër, mizore. Pushtues të ndryshëm që kanë sunduar vendin tonë e kanë quajtur “gjuhë barbare” dhe kanë bërë përpjekje për ta shfarosur me të gjitha mënyrat. Shumë atdhetarë dhe patriotë të shquar shqiptarë dhanë jetën e tyre, që shqipja të mos vdiste, por të jetonte... Dhe rruga deri në Kongresin e Manastirit qe mjaft e vështirë, por vendimtare për fatin e gjuhës sonë. E sot, falë këtyre përpjekjeve të përgjakshme, ne kemi një pasuri kombëtare, siç është gjuha jonë.

Një pasuri që nuk e njohim, që nuk e vlerësojmë dhe nuk dimë ta çmojmë... Një pasuri që sot po e përdhosim çdo ditë e më shumë... E për këtë mjafton të ecësh rrugëve e t’u hedhësh një sytë tabelave të dyqaneve e bareve të ndryshme, ku mjaft rrallë të rastis të shohësh emërtime në shqip, sepse të gjitha janë në anglisht, italisht, greqisht, kinezisht, japonisht etj., si: “New fashion”, “Books House”, “Boutique jeunesse”, “Le petit café”, “Fast food”, “Pizzeria ‘Dolce vita’”, “Chinese food”, “Magic center” etj.  E teksa ecën rrugëve të Tiranës, të duket vetja sikur këtu janë bërë bashkë rrugët e Nju-Jorkut, Londrës, Parisit, Romës, Athinës dhe ti nuk di në ç’vend je! Por kjo është vetëm maja e ajsbergut e problemeve të gjuhës sonë.

Edhe ato pak emërtime në shqip që mund të gjesh, janë të stërmbushura me gabime drejtshkrimore, si p.sh.:  Hotel “Pik loti”, Mobilje italjane, Kpucari specjale, Furr buke “Dora e art” etj., etj. Madje në një nga marketet e shumta të kryeqytetit tonë, emërtimet e artikujve ishin shkruar kështu, si në foto!

Po, po, sot, në zemër të Shqipërisë, shqipja shkruhet edhe kështu! Dhe këtu shprehja e studiuesit Zavalani është kaq e gjetur: Mjerë gjuha shqipe ç’i punojnë dhe s’ka gjuhë të ankohet?!

(Nga Sevi (Lami) Agolli, Portali Shkollor)