Tërmeti i fuqishëm, pezullohet për dy ditë mësimi, shkolla nis më 2 dhjetor

Ministrja e Arsimit Besa Shahini ka njoftuar se edhe dita e sotme, 27 nëntor, do të jetë pushim për të gjitha shkollat, kopshtet dhe çerdhet e vendit. Shkollat do të vijojnë pushimet për 6 ditët në vijim, duke qenë se dita e enjte dhe e premte janë pushim zyrtar për festat e nëntorit. 

Përmes një statusi në ‘Facebook’, Shahini bën me dije se ekipet po vijojnë me evidentimin e dëmeve materiale dhe hartimin e planit të masave për shkollat e dëmtuara. Nga inspektimi i deri tanishëm, 10 shkolla nuk janë funksionale për shkak të dëmeve të shumta nga tërmeti. Më tej, e tronditur Ministrja Shahini  shpreh ngushëllimet ndaj të gjitha familjeve që kanë humbur njerëzit e tyre të dashur. 

“Jam e tronditur nga humbja e jetëve dhe lëndimet trupore që kanë pësuar qytetarët si pasojë e tërmetit, siç besoj është edhe e gjithë Shqipëria. Ndaj kemi vendosur që të pezullojmë mësimin në të gjitha shkollat, kopshtet dhe çerdhet e vendit (përfshirë jo-publiket) edhe në datën 27 Nëntor në mënyrë që familjet të qëndrojnë së bashku dhe ta përballojnë situatën duke u solidarizuar me ata që u prekën më së shumti nga kjo tragjedi. Bëj me dije se ekipet tona po vijojnë ndërkohë me evidentimin e dëmeve materiale dhe hartimin e planit të masave për shkollat e dëmtuara. Gjej rastin të përcjell ngushëllimet më të sinqerta ndaj të gjitha familjeve që kanë humbur njerëzit e tyre të dashur, si dhe t’i uroj shërim sa më të shpejtë të gjithë të lënduarve!”, shkruan Shahini në një status në Facebook.

(Portali Shkollor)