Nisi sot zyrtarisht viti i ri shkollor nën masa anti-covid, prindërit peticion kundër mësimit me turne

Mësuesit duhet të kenë certifikatë vaksinimi ose test Covid, nxënësit me maska

500 mijë nxënës janë ulur sot në bankat e shkollave për të nisur vitin e ri shkollor. Edhe këtë vit mësimi nuk do të zhvillohet në kushte normale. Në disa shkolla do të ketë orë 25-minutëshe, ndërsa të tjera do të funksionojnë me dy turne me orë 30 minuta. 

Mësuesit duhet të kenë certifikatë vaksinimi ose test të përjavshëm ndaj COVID-19. Po ashtu, në klasa është e detyrueshme maska, distanca si dhe mësimi zhvillohet me orë fikse.

Një ditë më parë, ministrja e Arsimit dhe Sportit, Evis Kushi, uroi të gjithë nxënësit që të hënën do të rikthehen në bankat e shkollës.

Nëpërmjet një videomesazhi, ministrja Kushi shprehet se në të gjitha shkollat janë marrë masat për mbarëvajtjen e vitit shkollor. Ajo gjithashtu ftoi nxënësit të respektojnë masat anti-Covid pasi shëndeti është elementi më i rëndësishëm në këto kohë pandemie.

Jo mësimit me turne, prindërit nisin peticionin

Një peticion online ka nisur të firmoset nga prindërit për të kundërshtuar mësimin me turne. Në nisjen e vitit të ri shkollor, Ministria e Arsimit ka vendosur që të rikthejë mësimet me turne për shkak të pandemisë, por ky vendim ka nxitur reagimin e disa prindërve.

Sipas tyre, fëmijët dhe adoleshentët janë më pak të riskuar nga pandemia dhe kërkojnë kthimin në normalitet.

Deri tani, mbi 3400 prindër kanë firmosur online për kthimin e fëmijëve në shkolla me orë të plota dhe pa turne. Në vendin tonë, janë mbi 300 shkolla që do ta zhvillojnë mësimin me turne.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.