Ministrja Margariti, surprizë në shtëpi mësueses frymëzuese të ëndrrave të gjimnazit

Për 7 mars, me buqetë me lule në duar, Ministrja e re e Kulturës, Elva Margariti ka vizituar mësuesen Sonja Vila, sot në pension, e cila e befasuar nga takimi, e vlerësoi këtë vizitë të papritur

“Jam e sigurt në aftësitë dhe rolin që po luan rinia e sotme në zhvillimet e vendit. Një brez i shkëlqyer i dijes dhe arsimit, që jam e bindur se do të ngre lart emrin e Shqipërisë brenda dhe jashtë vendit. Ju uroj suksese në detyrën si ministre për të realizuar të gjitha  angazhimet e institucionit që drejtoni”, u shpreh mësuese Vila pas surprizës që iu bë. 

Ndërkaq ministrja Margariti duke e falenderuar dhe shprehur mirënjohjen për mësuesen e saj të gjimnazit, shkroi në rrjetin social facebook:

Sot në ditën e 7 marsit  u ktheva pas në vite, në orët e veçanta të letërsisë, ku zysh Sonja Vila mbetet mësuesja frymëzuese e ëndrrave të mia të gjimnazit.

E dashur zysh Sonja. Në këtë ditë të veçantë JU falenderoj publikisht që më mësuat përmes debateve në orën tuaj angazhimin si qytetare e shoqërisë shqiptare dhe përgjegjësinë për çdo hap të hedhur. Ju falenderoj që zbuluat më të mirën  tek çdo gjimnazist i brezit tim dhe na forcuat dëshirën dhe pasionin për ti shërbyer vendit  dhe për të ndjekur ëndrrat  që bëhen realitet me punë e përpjekje.

Me mirënjohje për vlerat që më keni përcjellë gjatë viteve kur keni qenë mësuesja ime.

Jetë gjatë dhe punë të mbarë në angazhimet tuaja që nuk ‘ndalojnë’ me pensionin!”

(Portali Shkollor)