Videot e shkurtra shpërqendrojnë fëmijët dhe ndikojnë negativisht në rezultatet e tyre shkollore

Videot e shkurtra që shohin fëmijët ndikojnë në për keq në rezultatet e tyre në mësime. Një studim kinez tregon se këto video zvogëlojnë vëmendjen dhe ndikojnë negativisht në suksesin shkollor. Prindërit duhet të vendosin kufij dhe të japin shembull për një përdorim të shëndetshëm të mediave digjitale.

Nga David Bême

Burimi: këtu

Ndërkohë që disa studime të mëparshme kanë theksuar efektet negative të videove të shkurtra, duke përfshirë nxitjen e mërzisë, një studim i ri nga Akademia Kineze e Shkencave, i publikuar në revistën PLOS One, nxjerr në pah ndikimin negativ të tyre në rezultatet akademike të nxënësve të vegjël.

Lidhja mes mungesës së vëmendjes dhe videove të shkurtra

Duke analizuar zakonet e 1,052 nxënësve të shkollave fillore në Shenzhen, Kinë, studiuesit kanë vërtetuar një lidhje midis mungesës së tyre të konsiderueshme të vëmendjes dhe konsumimit të madh të videove të shkurtra:

"Videot e shkurtra janë shpesh të dizajnuara me imazhe shumë tërheqëse dhe përmbajtje të shpejtë e magjepsëse, gjë që mund të krijojë varësi te përdoruesit e rinj. Kjo varësi mund të çojë në angazhim të zgjatur, duke i larguar nxënësit nga studimet e tyre", thuhet në studim.

Ky problem është edhe më i përhapur te studentët e rinj kinezë:

"Përqindja e të miturve që përdorin aplikacione me video të shkurtra, si Këai dhe TikTok, arrin në 65.3%, duke i bërë këto video një pjesë thelbësore të jetës së tyre online. Statistikat tregojnë se përdorimi i këtyre aplikacioneve nga nxënësit e shkollave fillore ka arritur në 66%, një shifër më e lartë se ajo e nxënësve të shkollave të mesme (62.7%)", thuhet në studim.

Ulja e vëmendjes dhe dobësimi i rezultateve akademike

Rezultatet e studimit janë të qarta: konsumimi i videove të shkurtra zvogëlon vëmendjen e nxënësve, duke ndikuar në aftësinë e tyre për t’u përqendruar në klasë dhe, rrjedhimisht, për të marrë nota të mira:

"Hulumtimi ka konfirmuar lidhjen e ngushtë midis përdorimit të tepruar të videove të shkurtra nga nxënësit e shkollës fillore dhe rënies së rezultateve të tyre akademike, duke theksuar ndikimin potencial të medieve në arritjet e tyre shkollore", theksojnë studiuesit.

Me rritjen e numrit të platformave që ofrojnë video të shkurtra, studimi nënvizon "kërcënimin potencial për aftësitë njohëse të nxënësve" dhe "ndikimin afatgjatë të medieve digjitale në zhvillimin e tyre intelektual".

Prindërit duhet të japin shembull dhe të krijojnë një kuadër të qartë

Megjithatë, fëmijët nuk janë të vetmit përgjegjës për këtë situatë. Kontrolli prindëror del të jetë një faktor i rëndësishëm në këtë ekuacion:

"Përdorimi i videove të shkurtra nga prindërit krijon një model sjelljeje për fëmijët, duke e bërë atë të duket si diçka e pranueshme pa shkaktuar ndjenja negative apo vetëkontroll të ndërgjegjshëm", shpjegojnë studiuesit. Me fjalë të tjera, nëse një prind shikon shpesh video të shkurtra, fëmija do të ndihet i justifikuar ta bëjë të njëjtën gjë dhe do të jetë më pak i kontrolluar.

Sipas studimit, prindërit luajnë një rol thelbësor në mirëqenien dhe suksesin akademik të fëmijëve të tyre:

"Menaxhimi i medieve digjitale brenda mjedisit familjar duhet të jetë një prioritet për të ndikuar në vëmendjen dhe rezultatet shkollore të fëmijëve. Prindërit duhet të jenë të vetëdijshëm për ndikimin e sjelljes së tyre në përdorimin e medieve dhe të përpiqen të krijojnë modele pozitive të përdorimit të videove të shkurtra".

Për t’i ndihmuar në këtë proces, studimi sugjeron disa masa, si përcaktimi i një kohe të kufizuar për këtë aktivitet:

"Prindërit dhe fëmijët mund të bien dakord për të kufizuar kohën e përdorimit të videove të shkurtra dhe të respektojnë këtë rregull së bashku, duke nxitur më shumë aktivitete në natyrë dhe komunikim ballë për ballë".