Nga Ferrara drejt Kampionatit Italian, motrat Gjoka dy talente premtuese në shah

Asia dhe Cloe Gjoka, dy motrat e talentuara në shah, kanë shënuar një tjetër sukses të rëndësishëm në garat sportive në Itali. Pasi triumfuan në Kampionatin e Shahut në Ferrara në kategoritë e tyre përkatëse, ato janë kualifikuar për të garuar në Kampionatin Italian të të Rinjve. Asia, 11 vjeçe, do të përfaqësojë kategorinë U12, ndërsa Cloe, 9 vjeçe, do të konkurrojë në kategorinë U10 shkruan Diaspora Shqiptare.

Përveç pasionit për shahun, Asia dhe Cloe janë gjithashtu nxënëse të përkushtuara në shkollën shqipe të Ferrarës, të cilën e ndjekin prej dy vitesh pa munguar në asnjë orë mësimi apo aktivitet. Kjo dëshmon jo vetëm disiplinën dhe seriozitetin e tyre, por edhe mbështetjen e palëkundur të familjes, e cila i inkurajon si në zhvillimin sportiv ashtu edhe në ruajtjen e kulturës dhe identitetit të vendit të origjinës.

Suksesi i motrave Gjoka është një vlerë e shtuar për komunitetin shqiptar në Ferrara, ku gjithnjë e më shumë fëmijë angazhohen në aktivitete sportive dhe kulturore, duke treguar talent dhe përkushtim në fusha të ndryshme. Ky është një tjetër shembull frymëzues i brezit të ri, i cili, përmes punës dhe pasionit, arrin të shënojë arritje të mëdha edhe në arenën kombëtare.

Marrë nga Diaspora Shqiptare 

© Portali Shkollor - Të gjitha të drejtat e rezervuara. Ndalohet kopjimi pa lejen tonë.