“Leximi dhe buzëqeshja duhet të mbushin jetën e secilit”, aktiviteti i veçantë nga nxënësit e Lezhës

“Dita e buzëqeshjes” është një aktivitet i kthyer në traditë për Lezhën prej 10 vitesh, me moton e saj për të shpërndarë buzëqeshje në të gjithë qytetin e Lezhës por edhe në Shëngjin.

Shkolla 9-vjecare “Besëlidhja” në Lezhë dhe mësuesja ideatore dhe realizuese e këtij projekti të bukur, Lulezime Celami, sollën sërish buzëqeshjen e fëmijëve për të dhuruar buzëqeshje, për të cilën kanë më shumë nevojë njerëzit sot.

Shporta të mbushura me pergamena, thënie që synojnë të nxisin mirësinë, dashurinë dhe gëzimin tek secili e të përgatitura nga vetë nxënësit e shkollës Besëlidhja, mbushen rruget e qytetit duke ju kërkuar qytetarëve që të dhurojnë sa më shumë buzëqeshje.

Mesazhet e kesaj dite, që u shpalosen nga mësuese Lulzime Celami, drejtoresha e shkollës “Beselidhja”, Anisa Skandaj dhe përgjegjësi i bibliotekës “Gjergj Fishta”, z. Albert Çuko, përkonin jo vetëm me “Ditën e Buzëqeshjes” por edhe me Ditën Boterore të Librit për Fëmijë, duke vënë theksin se leximi dhe buzëqeshja duhet të mbushin jetën e secilit.

Këto mesazhe shkuan në cdo institucion, lulishte e kafenetë e qytetit, duke e kthyer Lezhën, të pakten për një ditë, në qytetin e buzëqeshjes.

A mundën këta fëmijë për pak minuta të krijonin atmosferë në qytet?! Të sillnin sadopak buzëqeshje?! -PO.

U përpoqën dhe ia dolën. Po sikur secili prej nesh të përpiqej sadopak për të bërë tjetrin të ndihej mirë?! Atëherë do të jetonim në një botë më të bukur! Këtë bënë nxënësit e klasës së 2-të në Ditën Ndërkombëtare të Librit për Fëmijë.

“Libri dhe Buzëqeshja” festuan me këta fëmijë duke përmbushur misionin e tyre për t'i dhënë ngjyrat e bukura jetës, ato të Mirësisë, Dashurisë, Paqes e Lumturisë.

Mbi 2000 pergamenë me këta thënie u ndanë anembanë qytetit.