Prezantohet Dokumenti i Politikave të Arsimit të Lartë 2030: Risitë dhe objektivat kryesore

Sot, u prezantua Dokumenti i Politikave të Arsimit të Lartë 2030, një nga dokumentet më të rëndësishme të viteve të fundit për zhvillimin e arsimit të lartë në Shqipëri. Ky dokument është hartuar nga Ministria e Arsimit dhe Sportit, në bashkëpunim të ngushtë me universitetet, ekspertët vendas dhe ata ndërkombëtarë, dhe synon të përafrojë sistemin arsimor shqiptar me standardet ndërkombëtare.

Një nga risitë kryesore të këtij dokumenti është përmirësimi i fleksibilitetit dhe autonomisë për universitetet. Ky aspekt do t'i mundësojë atyre të përshtaten më mirë me kërkesat e tregut të punës dhe zhvillimet globale. Përmes rishikimit të kuadrit ligjor, universitetet do të kenë mundësinë të krijojnë programe të reja studimi, të cilat do të ndihmojnë në përgatitjen e studentëve për nevojat e industrisë dhe profesioneve të kërkuara. Një element tjetër është kombinimi i degëve të ndryshme studimi, si për shembull, degët e studimeve shoqërore me teknologjitë e informacionit, i cili synon të krijojë mundësi të reja për studentët.

Profili i universiteteve dhe krijimi i modaliteteve të reja studimi janë gjithashtu pjesë e planit. Kjo do të ndihmojë në rritjen e interesit për aplikimet në degët që kërkohen nga tregu i punës, si dhe në ofrimin e mundësive për studentët të përgatiten për profesione të ardhshme. Ministrja e Arsimit dhe Sportit, Ogerta Manastirliu, theksoi rëndësinë e këtyre ndryshimeve dhe theksoi se ky plan garanton më shumë fleksibilitet dhe autonomi për universitetet shqiptare.

“Shtyllat e këtij dokumenti, lidhen me rishikimin e kuadrit ligjor të arsimit të lartë për të reflektuar sfidat dhe hapjen e mundësive të reja për universitetet. Vendosja e instrumenteve ligjore të reja që ofrojnë për universitetet më shumë fleksibilitet dhe më shumë autonomi për të vendosur vetë për programet e reja të studimit është një prej elementeve që kërkon instrumente të cilat mund të përshtaten dhe të adaptohen me gjithë strukturat e universiteteve tona, për të krijuar më shumë lehtësi dhe përshtatje me specialitetet dhe sigurisht edhe me kërkesat e kohës”, tha Manasterliu. 

Një tjetër risi e rëndësishme është ndryshimi i sistemit të financimit, i cili do të bazohet në performancën akademike të universiteteve. Ky hap synon mbështetje më të drejtpërdrejtë për kërkimin shkencor dhe pjesëmarrjen në projekte ndërkombëtare. Përveç kësaj, një nga elementët kyç është krijimi i mundësive për universitete që të zhvillojnë kampuse të reja dhe të rrisin bashkëpunimet me universitete të njohura europiane.

Në fjalimin e tij, Kryeministri Edi Rama theksoi se ky dokument ka një rëndësi të veçantë pasi është një produkt i brendshëm, hartuar në bashkëpunim me universitetet dhe ekspertët, dhe se nuk është një recetë që vjen nga jashtë. Ai theksoi se ky është një hap i rëndësishëm për të rritur kapacitetet e arsimit të lartë dhe për të mundësuar që Shqipëria të përshtatet më mirë me kërkesat globale.

Në të njëjtën linjë, Ministrja Ogerta Manastirliu theksoi që një nga objektivat kryesore të këtij dokumenti është përmirësimi i cilësisë së arsimit të lartë në Shqipëri dhe përfaqësimi më i fortë i universiteteve në nivel ndërkombëtar. Sipas saj, një hap i rëndësishëm do të jetë përfshirja e Shqipërisë në ENQA (European Association for Quality Assurance in Higher Education), që do të sjellë një rritje të pavarësisë së Bordit të Akreditimit dhe përmirësimin e standardeve të arsimit të lartë.

© Portali Shkollor - Të gjitha të drejtat e rezervuara. Ndalohet kopjimi pa lejen tonë.