Një guidë e thjeshtë për menaxhimin e burimeve njerëzore në shkollë

Nga Fiqiri Çifliku, ekspert arsimi

“Kur bën diçka, bëje mirë. Në rast se nuk mundesh ose nuk dëshiron ta bësh mirë, atëherë mos e bëj fare.”- Leo Tolstoy

Në çdo sipërmarrje motivimi dhe mbajtja e stafit konsiderohet vendimtar për suksesin e organizatës. Punonjësit e motivuar ndihmojnë në rritjen e produktivitetit, kënaqësisë dhe cilësisë së shërbimit. Megjithatë, motivimi i punonjësve nuk është gjithmonë një proces i lehtë dhe kërkon një qasje strategjike. Motivimi dhe kënaqësia në punë janë procese komplekse që ndikohen nga faktorë të ndryshëm. Disa faktorë motivues të rëndësishëm që ndikojnë në performancën e punonjësve janë:

a) Paga dhe vlerësimi: Rritja e pagës, mundësia për rritje profesionale dhe vlerësimi janë faktorë kryesorë motivues. Punonjësit i shohin këto si shpërblime për punën e tyre dhe si një mënyrë për të arritur përparim personal dhe profesional.

b) Mundësia e zhvillimit personal: Punonjësit janë të motivuar kur kanë mundësi për të mësuar dhe zhvilluar aftësitë e tyre. Trajnimet, seminaret dhe mundësitë e rritjes personale janë faktorë që i inkurajojnë ata.

c) Marrëdhëniet ndërpersonale: Një ambient i mirë pune, marrëdhëniet pozitive me kolegët, drejtuesit dhe përfituesit e shërbimit të tyre, ndikojnë në motivimin e punonjësve. Një atmosferë e harmonizuar dhe bashkëpunimi ndihmojnë në performancë më të lartë.

d) Përkatësia ndaj qëllimeve të organizatës dhe krijimi i vlerës: Kur punonjësit kuptojnë rëndësinë e punës së tyre, ndihen se kontribuojnë drejtpërdrejtë në qëllimet e organizatës dhe ndikojnë në suksesin e saj, janë më të motivuar.

Motivimi është vetëm një element në procesin e menaxhimit të burimeve njerëzore në shkolla, i lidhur ngushtë me procese të tjera si; vlerësimi i nevojave dhe rekrutimi i mësuesve të rinj. Drejtuesi i institucionit pas rektutimit të stafit kujdeset për ndarjen e punës, trajnimin, zhvillimin apo përcaktimin e pagave dhe përfitimeve të tjera. Ai ka përgjegjësinë kryesore për administrimin e burimeve njerëzore në shkollë si dhe zbatimin e kuadrit ligjor në fushën e punës.

E gjithë veprimtaria, kryhet nëpërmjet një procesi komunikimi të ndërsjelltë që duhet të jetë i qartë, i kuptueshëm dhe të nxisë veprimin e drejtë dhe konkret të punonjësve, të përfshirë në veprimtarinë e shkollës.

Për t’i ardhur në ndihmë drejtuesve, por edhe stafit të shkollës po ndajmë një guidë për menaxhimin e burimeve njerëzore në institucionin arsimor.

Lexim të këndshëm!