Ministrja Kushi mesazh të fortë Diasporës nga Torino: Ta mbrojmë me fanatizëm gjuhën shqipe!

Gjatë fjalës së saj në takimin e titulluar “Letra nga Diaspora”, Ministrja Kushi nënvizoi rëndësinë e mbrojtjes dhe përhapjes së gjuhës shqipe, duke thënë se një shtet pa gjuhën e tij nuk ka identitet, nuk ka histori, nuk ka as të ardhme, ndaj dhe shqipja duhet mbrojtur dhe mësuar me fanatizëm.

Ministrja e Arsimit dhe Sportit Evis Kushi në edicionin e 35-të të Sallonit Ndërkombëtar të Librit në Torino dha mesazhe të forta për mbrojtjen e gjuhës shqipe, gjatë një bashkëbisedimi me nxënës dhe mësues nga qytete të ndryshme të Italisë.

Kushi shprehu mirënjohje për punën e mësuesve të gjuhës shqipe të cilët u japin mësim qindra mijëra fëmijëve shqiptarë që jetojnë jashtë vendit. Ajo shtoi se këta mësues kanë zgjedhur këtë profesion humanitar dhe çdo ditë japin kontributin e tyre për ruajtjen e gjuhës dhe kulturës sonë tek fëmijët dhe të rinjtë në Itali, por jo vetëm.

“Të gjithë jemi krenarë për gjuhen shqipe, një gjuhë e lashtë, e bukur, një gjuhë që përveç se duhet ta ruajmë, duhet ta trashëgojmë brez pas brezi, të bukur e të pastër, ashtu siç na e kanë përcjellë paraardhësit tanë, por duhet edhe vlerat e saj t’ua prezantojmë edhe të tjerëve. Pra jo thjeshtë ta kemi brenda familjeve tona, brenda shtëpisë, brenda Shqipërisë, por të krenohemi me të edhe në vende të tjera,” - theksoi ministrja.

Ministrja shtoi se: “Gjuha shqipe është gjuhë zyrtare në Shqipëri, Kosovë e Maqedoni të Veriut, është gjuhë që mbrohet dhe flitet edhe në vende të tjera, Mali i Zi, Kroaci, në vend të tjera të rajonit, por është një gjithë që mësohet në rreth 400 shkolla në shumë vende të botës, si Itali, Greqi, Gjermani, Austri, Zvicër, Kanada, Amerikë dhe Australi.”

Gjuha shqipe mësohet edhe në universitete prestigjioze ku ka departamente të gjuhës shqipe, si universiteti i Bolonjës, universiteti i Mynihut dhe universiteti i Harvardit.

“Pra imagjinoni sa shumë ka ecur përpara. E mësojnë sot 30 mijë shqiptar kudo në botë, përveç Shqipërisë, por ne nuk duhet të kënaqemi me kaq,” - tha Znj.Kushi.