Hapen aplikimet për provimin e licencës 2025, regjistrimet mbyllen më 14 prill

Qendra e Shërbimeve Arsimore (QSHA) ka shpallur hapjen e aplikimeve për pjesëmarrjen në Provimin e Shtetit në profesionin e rregulluar të mësuesit për Sezonin XX. Aplikimi do të realizohet ekskluzivisht online përmes platformës e-Albania, nga data 7 deri më 14 Prill 2025.

Kandidatët e interesuar duhet të përdorin shërbimin “Aplikim për provim shteti” në platformë dhe të ngarkojnë këto dokumente:

Diplomën/diplomat përkatëse të studimeve;
Dëshminë e përfundimit të praktikës profesionale me kohëzgjatje të përcaktuar;
(Në raste të veçanta) dokumente për njohjen e diplomës nëse është marrë jashtë shtetit ose në institucione të mbyllura;
Faturën e pagesës për provimin, pas njoftimit për pranimin nga DRAP.

Për shtetasit e huaj, aplikimi bëhet duke përzgjedhur opsionin “shtetas i huaj” në platformën e-Albania dhe plotësuar të dhënat përkatëse.

Kandidatët do të njoftohen për çdo hap të procesit përmes email-it dhe portalit, ndërsa statusin e aplikimit mund ta gjurmojnë në kohë reale me kodin unik të gjurmimit.

Kalendari i detajuar dhe orari i provimit për çdo kandidat do ta publikojmë së shpejti, pasi të dalë zyrtarisht nga QSHA.

Orari është i pandryshueshëm, prandaj kandidatët këshillohen të kontrollojnë listat emërore dhe të kontaktojnë ZVAP/DRAP në rast pasaktësish.

Kujdes: Kandidatët duhet të paraqiten 30 minuta para provimit, të pajisur me mjet identifikimi origjinal. Gjatë provimit, ndalohen celularët, komunikimi mes kandidatëve, lëvizja nga vendi i caktuar, si dhe konsumimi i ushqimeve apo duhanit.

Kandidatët që e kalojnë me sukses këtë provim, mund të marrin pjesë menjëherë në testimin e informatizuar për punësim në institucionet arsimore publike të arsimit parauniversitar.

Programet orientuese dhe fondet e pyetjeve janë të publikuara në faqen zyrtare të QSHA-së: www.qsha.gov.al, ndërsa për testimin e informatizuar mund të konsultohen materialet në faqen e ASCAP: www.ascap.edu.al.