A mjaftojnë ndryshimet në udhëzimin 13?

NDRYSHOI UDHEZIMI 13, I MAJIT 2019!

Në "udhëzimin 13", famëkeqin e Majit 2019, për vlerësimin e mësuesve, ndodhin ndryshime!

Më në fund...

Kualifikimi i mësuesve, sipas nivelit dhe cilësisë së vlerësimit vlerësohet! Më në fund, Masterat e psonisura kuturu...nuk llogariten! Pooor...Vlerësimi i notës mesatare ulet në pikë vlerësimi!

Ende nuk ndryshon...

Akoma vjetërsia si zë i veçantë nuk vlerësohet e as që diskutohet fare për të! Vlerësimi për gjuhën e huaj, me certifikata siguruar kushedi se si, brenda vendit, pa u cilësuar as niveli... mbetet i pandryshuar!

A DUHET TË GËZOHEN MËSUESIT PËR KËTË FAKT?

Mendoj se është bërë diçka për të mbështetur mësuesit e vjetër! Është menduar diçka edhe për to, është vlerësuar më mirë kualifikimi...po vallë...a mjafton?! Kriteret tanimë janë të tilla...

Po zotërove licencën e mësuesit, merr 1 pikë vlerësimi në dosje.

Me kualifikim 5-vjeçar, në varësi të cilësisë zotëron 2-4 pikë!

Me kualifikim 10-vjeçar, në varësi të cilësisë zotëron 5-7 pikë!

Me kualifikim 20-vjeçar, në varësi të cilësisë zotëron 8-10 pikë!

MESATARJA...

Duke filluar nga nota 5, për çdo gjysmë note të zotëruar, përfiton 0.5 pikë në vlerësim! Nga nota 5-5.50 vlerësohet me 0,5 pikë, e kështu me radhë, deri në 9,5-10 kush përfiton 5 pikë!

PO A ËSHTË KJO ZGJIDHJA OPTIMALE?

Ka disa arsye që na e tregojnë më së miri se nuk është optimalisht zgjidhja e duhur!

Faktori kohë bën që kjo zgjidhje të ketë ardhur e vonuar pranë mësuesve! Në shumë shkolla pikëzimi është kryer bazuar në Udhëzimin e famshëm Nr.13.

Në shumë shkolla, mësues të rinj kanë dalë me më shumë pikë në garim dhe kanë bërë që në portal të “përplasen” mësuesit me përvojë! Ky ndryshim i tanishëm, pikërisht në këtë periudhë, çrregullon procesin dhe çorodit shumë mësues të vjetër!

Më herët duhet të ndodhte ky ndryshim udhëzimi!

Të ndodhte para mbylljes së vitit mësimor!

Edhe për certifikatat e gjuhës së huaj, asgjë nuk është bërë!

Ato vazhdojnë të jenë aty e te tunden nga kushdo si trofe e arritjes së kohës moderne të batakçillekut!

(Mos harrojmë se kemi plot mësues që detyruar nga pikëzimi i famshëm, zotërojnë certifikata të gjuhës së huaj, kur asnjë fjalë në atë gjuhë nuk dinë!)

Ndoshta është gjetur një e mesme e artë mes asaj që pretendojnë mësuesit e vjetër dhe asaj që pretendojnë nga pikëzimi mësuesit e rinj!

Ka akoma diçka të paqartë në këtë udhëzim të përmirësuar...

Vërtetë shkallët e kualifikimit vlerësohen sipas viteve që përmbajnë dhe cilësisë së vlerësimit të tyre, por për vitet midis 2 kualifikimeve nuk thuhet e nuk shkruhet asgjë....

Nuk mund të vlerësohet njësoj në pikë një mësues që sapo ka marrë kualifikimin 10-vjeçar, me një mësues që është në vitin e 19-të punës, dhe vetëm për një vit nuk e ka arritur dot kohën për të hyrë në kualifikimin 20-vjeçar!

Duhen gjetur mekanizma të vërtetë vlerësues që çdo vit eksperience mësuesi të mos shkojë dëm!

Nuk mund të vlerësohet me "rrumbullakim" vitesh eksperienca e mësuesit! Ka vlerë të madhe përvoja në mësimdhënie...!

Bota eksperiencën në punë e vlerëson ndër indikatorët e parë vlerësues të performancës profesionale! Është cilësi pune eksperienca, është shpejtësi pune dhe kohë e fituar!

E përsëri...gjithsesi...

Ai që penalizon serish, edhe pas këtyre ndryshimeve, është faktori kohë.

Më herët duhej të kishin ardhur këto ndryshime të udhëzimit të famshëm 13, të Majit të 2019-ës, që mësuesit e vjetër të mos përplaseshin dyerve të portalit, mundur me nënvlerësim përvoje e kualifikimi, me certifikata të zotëruara kuturu nga më të rinjtë! Kujdes duhej treguar edhe për vlerësimin e certifikatave të gjuhëve të huaja! Kujdes edhe në llogaritjen e viteve të punës midis dy kualifikimeve!

Gjithsesi, na mbetet te shpresojmë të bëhet më e mira!

Nga Albana Tare, mësuese në shkollën “Luigj Gurakuqi"-Elbasan, metodiste dhe trajnere në edukim