Projekt model për shkollat shqipe në Diasporë, “Magjia dhe bukuria e vjeshtës”

Projekti “Magjia dhe bukuria e vjeshtës” me nxënësit e shkollës shqipe “VS Jagdgasse 22” në Vjenë përfshiu lexim poezie, krijimin e fjalive me mbiemra, njohjen e produkteve të vjeshtës dhe shijimin e ushqimeve tradicionale. Përfundoi me këngë dhe foto të përbashkët. Përgatiti mësuesja Miradije Berisha.

Projekt model, realizuar me nxënësit e shkollës shqipe “VS Jagdgasse 22” në Vjenë, Austri

Tema: “Magjia dhe bukuria e vjeshtës”

Përshkrim i shkurtër i projektit nëpërmjet fotove!

Zbulo bukurinë e natyrës përmes mbiemrave

Pjesa e parë e projektit:

Fillimisht, biseduam për vjeshtën, pastaj lexuam pjesë letrare dhe poezi që përshkruajnë këtë stinë.

Në aspektin kreativ dhe motorik, nxënësit prenë gjethe, shkruan fjali për vjeshtën dhe i ngjitën në pllakatë.

Ushtrime:

Nga fjalët e zgjedhura, nxënësit formuluan fjali të shkurtra dhe të zgjeruara për vjeshtën, duke u përqendruar te dallimi dhe përdorimi i mbiemrave.

Detyrë për në shtëpi:

Nxënësit, sipas moshës dhe nivelit të klasës, duhet të shkruajnë fjalë, fjali të shkurtra ose të zgjeruara. Nxënësit e klasave më të mëdha do të shkruajnë ese, duke kaluar gradualisht nga fjalitë e thjeshta deri te eseja e plotë.

Pjesa e dytë e projektit:

U prezantuan pemët, perimet dhe drithërat e stinës së vjeshtës. Nxënësit mësuan për secilin produkt vjeshtor, i prekën, i dalluan dhe i shijuan, duke i përshkruar me mbiemra.

Pjesa e tretë e projektit:

U prezantuan ushqime tradicionale të përgatitura me produktet e vjeshtës. Gjithashtu, u bisedua për to, nxënësit i shijuan dhe i përshkruan, duke përdorur mbiemra për të pasuruar fjalitë e tyre.

Ushtrim:

Diktim, me fokus në përdorimin e mbiemrave për të përshkruar vjeshtën dhe produktet e saj.

Përfundimi i projektit:

Projekti u mbyll me një përsëritje të përgjithshme të gjithçkaje që u mësua, me këngë të dedikuara vjeshtës dhe në fund, me një foto të përbashkët me nxënësit.

Faleminderit prindërve për mbështetjen!