Arsyet pse shkollat duhet të kenë psikologë

Kohët kanë ndryshuar. Përderisa çështjet akademike janë akoma në fokus, faktorët socialë, ekonomikë dhe politikë kanë ndryshuar mjedisin shkollor. Në këtë mjedis, psikologët e shkollave kanë dalë si mbrojtës për fëmijët.

Janë pesë arsye kryesore pse janë të nevojshëm psikologët në shkolla:

1. Psikologu i shkollës mund të punojë si pjesë e një ekipi që përfshin mësuesit dhe punonjësin social. Ekspertiza e psikologut të shkollës është veçanërisht e dobishme në trajtimin e nevojave të fëmijëve me probleme dhe duke u siguruar në sukseset e tyre.

2. Psikologët e shkollave trajnohen për situata të sulmeve të panikut apo krizave. Është për të ardhur keq që krimi dhe dhuna janë të përfshirë në shkolla. Truri i fëmijëve i cili është në zhvillim është i ndjeshëm ndaj dëgjimit të incidenteve, aq më tepër të jenë dëshmitarë të tyre. Psikologu i shkollës është gjithmonë pjesë e ekipit në shkollë që është gati të ofrojë këshillim dhe mbështetje emocionale për fëmijët që preken nga tragjeditë, përfshirë vdekjen e shokëve të tyre, mësuesit dhe ngjarjet e tjera katastrofike që mund të ndikojnë në mënyrë të drejtpërdrejtë apo të tërthortë tek nxënësit.

3. Psikologët e shkollave ndihmojnë në krijimin e shkollave të sigurta dhe ambienteve pozitive, të cilat ndihmojnë në të mësuarit. Dhuna e të rinjve përfshin sjellje të ndryshme që mund të dëmtojnë dikë fizikisht dhe emocionalisht. Dhuna në shkollë mund të ndodh brenda ose jashtë territorit të shkollave në ngjarjet e organizuara nga shkolla. Bullying (ngacmime), kërcënime verbale, grindje fizike në çdo nivel dhe sulme me armë, fatkeqësisht janë bërë pjesë e mjedisit në disa shkolla.

4. Psikologu i shkollës luan një rol në forcimin e partneriteteve mes prindërve, shkollave dhe gjithë komunitetit. Psikologu i shkollës pritet të shërbejë si ndërlidhës midis familjeve dhe shkollës si dhe midis shkollës dhe komunitetit. Psikologu është një diplomat i trajnuar për të bashkuar njerëz të kulturave dhe prejardhjeve të ndryshme për të promovuar një mjedis mësimi që është i sigurt dhe gjithëpërfshirës.

5. Psikologët e shkollave mbështesin përpjekjet e llogaridhënies në shkolla përmes vlerësimeve. Testimi është një çështje e ndjeshme në shkollat e sotme. Psikologët e shkollave pritet të ndihmojnë në gjenerimin e të dhënave të dobishme përmes vlerësimeve që do të ndihmonin në identifikimin e fushave kritike për përmirësim akademik. Rezultatet e testit janë gjithashtu të dobishme në monitorimin e ngritjes së nxënësve gjatë një viti dhe përcaktimin e faktorëve të rrezikut që mund të kenë ndikim në rezultatet e të nxënit.

Psikologu i shkollës do të vazhdojë të luajë një rol thelbësor në sigurimin se shkollat janë të përgjegjshme ndaj një bote që ndryshon.

(Portali Shkollor)