Muzika apo qetësia për të mësuar?

Qetësia në dhomë nuk është e “artë” për të studiuar e mbi të gjitha për të bërë llogaritje aritmetike. Në fakt, sipas një kërkimi të departamentit të Psikologjisë të Universitetit të Milanos – “Bicocca”, për nxënësit do të ishte më e dobishme zhurma e shiut ose muzika në sfond se sa një ambient me qetësi të madhe. Kjo sipas tyre do të rriste kryesisht përqendrimin përgjatë kohës që fëmijët bëjnë detyrat e shkollës në shtëpi. 

Grupi i kërkimit, i koordinuar nga neuroshkenctarja Alice Mado Proverbio, ka shqyrtuar ndikimin e ushtruar nga lloje të ndryshme këngësh (ritmike, të qeta) apo tingujsh natyror (shiu, valët e detit) teksa nxënësit ishin duke lexuar fillimisht në qetësi. Nga studimi doli se qetësia ishte joproduktive kur nxënësit e përfshirë në studim duhet të çonin deri në fund llogaritjet aritmetike: ishin më të avasht dhe gabonim më shumë. Ndërkohë e kundërta ndodhte kur ata bënin detyrat dhe në sfond kishte muzikë: ishin më të përqendruar dhe i mbaronin detyrat më shpejtë dhe në mënyrë më pak të lodhshme. Studiuesit konstatuan se kjo nuk varet shumë nga llojet e tingujve muzikor se sa nga niveli i madh i aktivizimit të trurit dhe përqendrimi i shkaktuar nga dëgjimi. 

Alice Mado Proverbio shpjegoi se rezultati i hulumtimit erdhi nga fakti se "luhatjet e ritmit të sfondit të elektroencefalogramit (EEG) mund të sinkronizohen me frekuencën e stimulimit të dëgjimit. Kështu që, sa më shumë të rritet frekuenca e EEG aq më shumë qëndrojmë të kthjellët, reagues dhe të përqendruar”. 

E thënë nga këta studiues, provoni dhe ju të vendosni muzikë klasike ndërsa nxënësit apo fëmijët tuaj bëjnë detyrat, e veçanërisht ato të matematikës, për të parë rezultatin! 

(Përgatiti: Nanila Biçaku, Portali Shkollor)