“I joti Valentin”

Njerëzimi zgjedh të përcaktojë një datë përkujtimore (14 shkurtin) kushtuar dashurisë si vlerës më të fortë humane.

Legjendat tregojnë versione të papërcaktuara ku Valentini shfaqet si prifti martir i cili lidhi në kurorë dy të dashuruar në fshehtësi, e herë të tjera përshkruhet si autori i letrave drejtuar vajzës së tij me vizion të kthyer nga dashuria. Paçka varianteve, ideja luftës gjer në fund në emër të dashurisë vjen e përkorë gjer në ditët e sotme.

A mund të themi se në kaosin e marketingut social është skematizuar dashuria e shekullit tonë modern? Një dëshirë për ta vendosur në piedestalin e postimeve. Për ta fotografuar momentin më parë me aparatet fotografike dhe më pas me sy. Njeriu rreket ta ruajë të bukurën përmes rrjedhës së kohës, e këtu ka padyshim fisnikëri. E sërish, dëshira e kthyer në varësi për ta mbajtur dhe promovuar për masën vjen shëndetligë për habitatin zhvillimor të dashurisë mes një çifti. Një dashuri e planifikuar, transparente, publike, e fotografuar, manifest i vargut të objekteve të personifikuara…një traditë dashurore e ndarë nga origjinaliteti i idesë primare, e cunguar dhe e modifikuar rrugës… shpesh këto praktika bëjnë një hap pas kultivimit të ngrohtë të krijimit, vijueshmërisë dhe mbajtjes së ndjenjës së dashurisë. Në legjendë, veprimet e Valentinit janë jehonë për çdo brez se dashuria zhvillohet më e fortë përmes veprimeve të së gjallës, përmes shtrëngatave dhe peripecive, sa kohë vullneti i njerëzve nuk shteron.

Çfarë vjen si e gabuar apo e shtrënguar?

Legjendat në thelb e mishërojnë një bërthamë sado të vogël të vërtetësisë, fare mirë mund të besoni në bukurinë e një ideje të përçuar nga legjendat. Ndërkaq, çfarë vjen si e gabuar lidhet me këshillat mbi rrugën, manualin apo metodën që njerëzit duhet të ndjekin për të dashuruar. Secili individ dashuron në mënyrën e tij vetjake, unike dhe origjinale. Asnjë manual nuk ekziston. Besoni në preferencat vetjake. Çfarë i karakterizon pëlqimet e partnerit tuaj?

“Shikoni brenda njeriut dhe zbuloi nga buron dashuria e një njeriu. Të vërtetën e gjeni aty, jo të fjalët që nxjerr goja.” – Hipokriti.

Dashuria vibrohet më e lartë kur vishet me thjeshtësi. Lirshmëron përmes veprimeve jo të programuara. Një Shën Valentin i orientuar tek krijimi i një tradite të shëndetshme shijimi vetjak. Vetëm një çift, pa botën, pa teprica, pa ritual, në garë me kohën, përkrah të bukurës dhe intimitetit. Bota kthehet më e përkorë kur thjeshtëzohet në vetëm dy individë. Një letër mjafton për të tejçuar çfarë zemra ju dëfton të rrëfeni. Në çështjet e zemrës të gjithë mund të jenë rrëfimtarë, poet apo shkrimtarë. Pak vargje janë mjaftueshëm. Çdo letër nis me “ i/e dashur…” për të vijuar me lulka dhe ornamente sipas kujtimeve dhe veçorive që e kthejnë lidhjen dashurore në unike. Çdo dashuri është e ndryshme, kështu niseni me simbolikën e një letre, për njerëzit pranë, për të dashurit matanë detit, për këdo i cili iu bën të ndiheni falënderues ndaj dashurisë së dhënë.

Le ta ruajmë këtë humane me po aq fanatizëm sa edhe e flasim apo e fotografojmë.

Përgatiti Xhoana Jaku