Paga e mësuesit nis nga 95.000 lekë: Mesatarja 900 euro, reforma mbyllet në muajin korrik

Buxheti i vitit të ardhshëm do të vijojë financimin e shtesave në pagat e administratës publike. Rritja do të prekë kategoritë e mësuesve në arsimin parauniversitar. Për mësuesit e shkolla 9-vjeçare pagat pritet të arrijnë 95 550 lekë. Për mësuesit e gjimnazit do të shkojnë në 106 800 lekë.

Buxheti i vitit të ardhshëm do të vijojë financimin e shtesave në pagat e administratës publike në vlerën 11 miliardë lekë apo 110 milionë euro.

Rritja do të prekë kategoritë e mësuesve në arsimin parauniversitar, mjekëve të përgjithshëm dhe infermierëve, punonjësve të tjerë shëndetësorë, policët, ushtarakët dhe nivele zbatuese në administratën qendrore dhe vendore.

Në sistemet spitalore, përveç mjekëve specializantë, pritej që kategoritë e tjera të merrnin rritjen e pagës në dhjetor, por kjo nuk do të ndodhë. Rritja për ta do të fillojë nga prilli deri në korrik të vitit të ardhshëm.

Kështu edhe për mësuesit e 9-vjeçareve pagat pritet të arrijnë 95 550 lekë. Për mësuesit e gjimnazit shkon në 106 800 lekë, për mjekët e përgjithshëm në 131 672 lekë dhe për infermierët në 87 118 lekë. Janë 36 570 mësues në të gjithë Shqipërinë që do të përfitojnë nga kjo rritje e konsiderueshme.

Për gradën inspektor i parë në polici pagat pritet të shkojnë në 97 500 lekë. Për ushtarët grada e parë, e nëndetarit do të arrijë 960 euro.

Këto kategori morën gjatë këtij viti një rritje me 7%, por pati dhe përjashtime për mjekët specializantë dhe të familjes që përfituan nga 15 000 – 50 000 lekë rritje.

Edhe nëpunësit civilë, funksionarët dhe punonjësit mbështetës ishin përfitues nga pjesa e parë e reformës, ndërsa vitin e ardhshëm pritet të mos ketë paga më të ulëta se 50 mijë lekë.

Në udhëzimin e administratës publike shprehet se reforma totale të pagave do të mbarojë në dhjetorin e 2025-ës, për rritjen e pagës mesatare në 900 euro. (TCH)