Nxënësit në Shqipëri zhvillojnë 150 orë më pak në vit se fëmijët në BE

Nxënësit në arsimin e detyrueshëm në Shqipëri zhvillojë më pak orë mësimore se fëmijët në vendet e Bashkimit Europian. Sipas një raporti të Bankës Botërore, një nxënës në vend merr mesatarisht 150 orë mësimi më pak në vit se nxënësit e BE-së, ndërsa pandemia Covid-19 vështirësoi edhe më shumë procesin e të nxënit. 

Por a çon kjo për rrjedhojë në marrjen e më pak dijeve?

 “Për të qenë më konkret faktikisht efektiviteti i nxënësve që mbarojnë shkollën arsimin parauniversitar dhe shkollën e mesme në Shqipëri është 62%, që do të thotë e përkthyer në vite shkollimi, nga 13 vite shkollimi (besoj Banka Botërore ka llogaritur këtu edhe arsimin parashkollor), rreth 4 vite shkollimi shkojnë dëm”, kështu ka pohuar ekspertja e arsimit Valbona Nathanaili.

Sipas “Bankës”, mungesa e kohës së nevojshme mësimore pengon nxënësit për të zhvilluar dijet në lëndë kritike, si matematika dhe leximi.

Një tjetër problem i evidentuar është investimi në shkollat kryesisht në zonat urbane dhe lënia në harresë e institucioneve arsimore në periferi.

“Në një total ka një pabarazi në cilësinë e vet shkollës dhe nisur nga kjo kemi pabarazi edhe në cilësinë e arritjeve dhe të aftësive që këta nxënës përfitojnë në përfundim të arsimit parauniversitar”, ka thënë Valbona Nathanaili.

Banka Botërore, në raportin e publikuar parashikon se niveli i të mësuarit në vend vitet e fundit mund të ketë rënë me 9 pikë në rezultate e PISA, dije që sipas përllogaritjeve kërkojnë 3 muaj mësim që të rekuperohen.

Kaltra Tafani 

© Portali Shkollor- Të gjitha të drejtat e rezervuara. Ndalohet kopjimi pa lejen tonë.