"Një emër në katër rrugë", Albas publikon për herë të parë romanin e ndaluar të Petro Markos

Romani "Një emër në katër rrugë" i Petro Markos, botuar nga Albas, sjell një histori të thellë dashurie dhe sakrifice, që reflekton dhimbjen e autorit për ndalimin e veprës së tij në vitin 1973. Me një stil plot ndjenjë dhe poetikë, romani përshkruan dashurinë si forca e jetës dhe sfida e shpirtit njerëzor.

Romani i shumëpritur “Një emër në katër rrugë” i Petro Markos, një nga veprat më të realizuara të tij, është tani i disponueshëm për lexuesit shqiptarë nën botimin e Albas. Vepra, që u ndalua nga censura në vitin 1973, sjell një rrëfim të ndjerë për dashurinë dhe sfidat e jetës, duke reflektuar edhe dhimbjen e autorit për humbjen e lirisë së shprehjes. Ky ribotim vjen si një mundësi për të nderuar trashëgiminë letrare të Markos dhe për të ndarë me lexuesit një histori të fuqishme për harmoninë, ankthin dhe përballimin e pengesave shpirtërore.

Romani “Një emër në katër rrugë” është cilësuar si një nga veprat më të realizuara të Petro Markos.

Në të jepet gjithashtu mesazhi i fuqishëm, i përmbledhur kështu: Dashuria është jeta në harmoni, është shqetësimi para prehjes, është prehja para shqetësimit, është ankthi për t’u parë dhe nevoja për t’u përqafuar, është armiku i ndarjes dhe miku i afrimit, është dehja më e ëmbël e ndjenjave dhe ushqimi më njerëzor i dëshirave që s’kanë kufi...

Arianita Petro Marko (e bija):

"Në vitin 1973, pasi, i lumtur, mori në dorë të pesë kopjet e para, i shpërndau me nga një dedikim në pritje të ditëve që do të pasonin, të mbushura me emocione dhe gëzimin e krijuesit. Por mbeti vetëm kaq. Petro Marko mori mandatën: Romani do të tretej, do të shndërrohej në karton, njësoj sikur të mos ishte shkruar kurrë. Nuk ka pse të përmendim këtu arsyet e mundshme, ato që u thanë atëherë dhe ato që mund të dihen sot... Ajo që është më e rënda, më mizorja, është goditja e ftohtë, është dhembja e shkrimtarit, dhembja e Petro Markos.

Veprën e ndërtuar me tepër dashuri, ndjenjë, punë dhe mund, ia vranë që në çastet e para,kur ajo sapo do të shihte dritën..."

Shënim: Librin e gjeni në libraritë fizike Albas (Tiranë, Prishtinë, Tetovë, Preshevë) dhe online në këtë link; gjithashtu shumë shpejt edhe në Panairin e Librit.