"Duajeni Shqipërinë, jo vetëm për festa"

Shqipëria është vendi i banuar nga popujt më të vjetër të Europës i cili ka ruajtur gjuhen dhe traditat e saj edhe pse ndër shekuj janë përpjekur ta përbuzin dhe copëtojnë. Populli me cilësitë më të rralla në Ballkan ku kryeson respekti dhe nderi për fjalën e dhënë ndër shekuj, guximi, trimëria dhe shpirti i gjallë.

Ky popull fisnik pasardhës i ilirëve ku shpesh i kanë bërë ballë qëndresë të ashpër pushtuesve dhe veçanërisht sundimit turk. Fshatari, malësori fisnik dhe ushtari shqiptar ka luftuar si një zotëri i madh përball armikut dhe ka treguar vlerat e larta morale dhe të trimërisë që e ka karakterizuar atë ndër shekuj për mbrojtjen e trojeve të tyre. Dhe kur vihej në lojë tërësia e tokave shqiptare, atëherë fshiheshin të gjitha interesat e veçanta, armiqësitë, dallimet dhe kundërshtitë kulturore, fetare dhe partiake.

Shqipëria toka e shqiponjave, dhe bijve të shqipes gjuhës më të lashtë dhe më të veçantë në botë nga e cila rrjedhin të gjitha gjuhet e tjera të njerëzimit, e tokës së pasur me minerale, me pasuri dhe bukuri natyrore, lashtësi dhe kulturë ndër shekuj.

Flamuri kuq e zi magjepsës dhe i thjeshtë të krijon emocionet për tu ndjerë krenar, plot besim dhe guxim. Shqiponja e dyfishtë nëpër gjithë qiellin simbolizon shpirtin e lire dhe luftarak te popullit shqiptar. E kaluara dhe e tashmja, e lashta dhe modernia, të rinj dhe të moshuar, e bukura dhe hyjnorja, myslimane dhe të krishtere, të pasur dhe të varfër, veri dhe jug ndërthuren aq bukur duke shpalosur ekstremet e gjalla te dukshme të shoqërisë shqiptare.

Shqipëria është përpjekur të lërë pas të shkuarën komuniste dhe tranzicionin ndër vite dhe të gjejë rrugën e duhur drejt stabilitetit dhe prosperitetit ekonomik politik dhe social. Kjo tokë e lashtë dhe e pasur me histori nga burime të lashta, tradita dhe zakone meriton të jetë pjesë e familjes europiane duke dhënë kontributin e saj me njerëzit fisnik dhe me vlera në fusha të ndryshme që i shërbejnë shoqërisë njerëzore. Marr shkas ti uroj të gjithë shqiptarëve 110 vjetorin e Pavarësisë.