Albas pjesë e trajnimit në Athinë me temë “Metodat e mësimdhënies në kushtet e dygjuhësisë”

Shtëpia Botuese Albas mori pjesë në seminarin e organizuar në Athinë me temë "Metodat e Mësimdhënies në Kushtet e Dygjuhësisë", i cili u zhvillua gjatë fundjavës që lamë pas. Ky seminar u realizua nga Qendra e Botimeve për Diasporën në bashkëpunim me Ambasadën e Republikës së Shqipërisë në Greqi.

Ky seminar bëri bashkë 85 mësues të kurseve të mësimit plotësues të gjuhës shqipe nga e gjithë Greqia, të cilët ishin prezentë fizikisht dhe virtualisht, si dhe ekspertë nga Shqipëria dhe diaspora shqiptare.

Në hapje të seminarit, të pranishmit i përshëndetën figura të rëndësishme të fushës së arsimit dhe kulturës, mes të cilëve znj. Luela Hajdaraga, ambasadore e Republikës së Shqipërisë në Greqi; znj. Marina Kaishi, profesore dhe koordinatore akademike e Universitetit “New York College” në Athinë; znj. Mimoza Hysa, drejtoreshë e Qendrës së Botimeve për Diasporën; dhe znj. Klarita Selmanaj, kryetare e Lidhjes së Mësuesve Shqiptarë në Greqi.

Një pjesë e rëndësishme e këtij trajnimi ishin seancat informuese dhe trajnuese të mbajtura nga ekspertë të fushave të ndryshme. 

Znj. Rita Petro, bashkautore e teksteve “Gjuha shqipe dhe kultura shqiptare” për nivelet I dhe II, së bashku me znj. Ervisa Paloka, redaktore e këtyre teksteve, dhe znj. Aurela Konduri, autore e librit të mësuesit, ndanë përvojat e tyre në lidhje me përdorimin e këtyre materialeve gjatë procesit mësimor, duke ofruar udhëzime të dobishme për mësuesit që punojnë me nxënës që mësojnë në dy gjuhë.

Ato gjithashtu u ndalën edhe te digjitalizimi i paketave për mësimin e gjuhës dhe kulturës shqiptare kudo në botë, aq të pasura me materiale audio, video etj.  

Pjesëmarrja e Shtëpisë Botuese Albas në këtë trajnim vjen si pjesë e një serie të ngjashme aktivitetesh, të zhvilluara në qytete të tjera europiane si Cyrih dhe Milano, dhe thekson angazhimin e saj të vazhdueshëm për përmirësimin e arsimit dhe kulturës shqiptare jashtë vendit. 

Ndërkohë gjatë trajnimit në Athinë, fjalën e morën edhe specialistë të tjerë në fushën e mësimdhënies në kushtet e dygjuhësisë.

Znj. Linda Mëniku, profesoreshë e gjuhësisë në Universitetin e Tiranës, në seancën “Metodat e Mësimdhënies në Kushtet e Dygjuhësisë”, prezantoi metoda të avancuara për mësimdhënien e gjuhës shqipe në kushte dygjuhësie, duke theksuar rëndësinë e integrimit të elementëve kulturorë dhe didaktikë. 

Znj. Erida Koleci, përfaqësuese e Agjencisë së Sigurimit të Cilësisë së Arsimit Parauniversitar, i njohu pjesëmarrësit me udhëzuesin “Për zhvillimin e mësimit të gjuhës shqipe dhe kulturës shqiptare në kuadër të programit mësues për Greqinë”, duke shpjeguar strukturën dhe përmbajtjen e këtij udhëzuesi të rëndësishëm.

Një tjetër seancë interesante u mbajt nga z. Stavri Dajo, doktor i shkencave të historisë në Universitetin Aristoteli të Selanikut, i cili prezantoi temën "Interesi shkencor dhe akademik për gjuhën shqipe në Greqi përgjatë viteve (1945-2024)", duke ndarë të dhëna statistike dhe diskutuar mbi zhvillimin e studimeve të gjuhës shqipe në këtë vend, si dhe certifikimin e të nxënit të saj në Institutin e Studimeve Balkanologjike të Selanikut.

Seminari përfundoi me shpërndarjen e certifikatave të pjesëmarrjes për të gjithë të pranishmit, duke vlerësuar angazhimin dhe interesin e madh për zhvillimin e mësimdhënies në kushte dygjuhësie.

Nanila Allkja Biçaku 

© Portali Shkollor- Të gjitha të drejtat e rezervuara. Ndalohet kopjimi pa lejen tonë.