“La Sapienza” emërton sallën e studimit me emrin "Ilaria Sula", një homazh kundër dhunës ndaj grave

Universiteti prestigjioz italian “La Sapienza” në Romë ka përjetësuar kujtimin e studentes shqiptare Ilaria Sula, e cila humbi jetën në mënyrë tragjike disa javë më parë, në një rast të dyshuar feminicidi. Në një ceremoni të mbushur me emocione, salla më e madhe e re e studimit brenda Godinës së Teatrit të Ri Universitar u emërtua “Ilaria Sula”.

E reja 23-vjeçare, studente e shkencave statistikore dhe pjesë aktive e komunitetit akademik, u shpall e zhdukur më 25 mars. Pas disa ditësh kërkime, ajo u gjet e pajetë në rrethinat e Romës. Autoritetet italiane dyshojnë se është vrarë nga ish-partneri i saj, shtetasi filipinas Mark Antony Samson, i cili sipas hetimeve e goditi me thikë dhe më pas fshehu trupin në një valixhe, duke e hedhur në një zonë pyjore. Hetimet po vazhdojnë dhe dyshohet se ai mund të jetë ndihmuar edhe nga familjarë të tij.

Ceremonia përuruese e sallës u zhvillua në kuadër të 722-vjetorit të themelimit të “La Sapienza”-s, ku u inauguruan edhe dy hapësira të tjera të reja për studentët. Pranë hyrjes së sallës, është vendosur një pllakë përkujtimore me mbishkrimin:

“Ilaria, studente e Sapienza-s, për të mos harruar të gjitha gratë viktima të feminicidit, të cilave u është ndërprerë mundësia për të shkruar të ardhmen e tyre.”

Në këtë ceremoni prekëse morën pjesë prindërit dhe vëllai i Ilaria Sulës. Babai i saj, Flamur Sula, falënderoi drejtuesit e universitetit për këtë nder të jashtëzakonshëm, duke deklaruar me emocione: “Sot Ilaria rilindi.”

Nisma e “La Sapienza”-s vjen si një akt simbolik për të mos lejuar që dhuna ndaj grave të mbulohet me heshtje dhe për të ruajtur kujtimin e një të reje që kishte një të ardhme premtuese përpara. Emri i Ilaria Sulës tashmë mbetet i gdhendur jo vetëm në kujtimet e të afërmve, por edhe në historinë e këtij institucioni të njohur akademik.