Koordinatori i cilësisë në shkolla/ Edlira Angjeliu: Dilemat, vështirësitë, arritjet…

Nga Edlira Angjeliu- mësuese në gjimnazin “Kristaq Capo”, Berat 

Këtë vit, pranë çdo institucioni shkollor, do të funksionojë edhe koordinatori i cilësisë. Fillimi i mbarë për çdo koordinator, do të ishte, të fitonte besimin e të gjithë mësuesve të shkollës. 

E rëndësishme qysh në fillim të punës së tij është koordinimi i punës me drejtuesit e ekipit lëndor, drejtuesin e rrjetit profesional, mësuesin e ngarkuar me aktivitetet shkollore, mësuesin e angazhuar me përgatitjen e nxënësve për olimpiada dhe padyshim me drejtuesit e shkollës si dhe institucioneve arsimore. Koordinatori i cilësisë nuk zëvendëson punën e asnjërit prej tyre por e plotëson atë me fokusin e përbashkët-rritja e cilësisë së arsimit në shkollë. 

Pozicioni i koordinatorit të cilësisë në shkollë duhet të jetë: lehtësues, orientues, ndihmues, nxitës, promovues etj etj. Shumë diskutime ka në grupe mësuesish, pyetje, mendime, supozime, mëdyshje etj si çdo risi që nis të aplikohet. E vendosim për një moment veten në pozicionin e koordinatorit të cilësisë, çfarë do të sugjerojë secili prej nesh?

Koordinatori i cilësisë, për mendimin tim, duhet ta fillojë punën e tij me mbledhjen e të dhënave mbi cilësinë e procesit të mësimdhënie-nxënies në atë shkollë ku do të luaj këtë funksion. Të dhënat duhet të jenë sasiore dhe cilësore. 

 Të dhënat sasiore:

• Nota mesatare dhe kalueshmëria , si objektiva të shkollës në vitin paraardhës. 

• Nota mesatare dhe kalueshmëria për çdo mësues në klasat ku jepte mësim në vitin paraardhës. 

• Vitet e punës për çdo mësues. 

• Numër kreditesh për çdo mësues. 

• Rezultate të provimeve të MSH. ( etj në vazhdimësi).

Të dhëna cilësore:

• Projekte të realizuara në shkollë. 

• Rezultatet e nxënësve në konkurse kombëtare, ndërkombëtare, olimpiada etj. 

• Zhvillim profesional individual i mësuesve ( certifikata, pjesëmarrje në konferenca, simpoziume, trajnime, botime, publikime etj).

• Rezultate të grupeve të vlerësimit të shkollës . (etj në vazhdim).

Pikërisht, duke u mbështetur mbi këto të dhëna, koordinatori i cilësisë do të ndërtojë planin e punës. Metodologjia për të marrë këtë informacion dhe zhvilluar punë e tij është e larmishme dhe personale për çdo koordinator si: shqyrtim dokumentacioni, fokus-grup, tryeza të rrumbullakëta, trajnime, veprimtari konkrete, biseda të lira, pyetësorë etj. 

Dihet tashmë se në shkollat tona funksionon, ekipi lëndor, ekipi kurrikular i shkollës, rrjetet profesionale, plani i punës së drejtorisë etj dhe koordinatori i cilësisë duhet të koordinojë punën me gjithë këto organizma shkollore dhe jo të përsëritë punën e bërë prej tyre. 

Konkretisht, nëse drejtuesi i ekipit lëndor ka planifikuar të zhvillojë me mësuesit e një fushe, një tematikë mbi platformën mësimore STEAM, koordinatori i cilësisë plotëson trajnimin me informacione sa më të efektshme mbi përmbajtjen, vështirësitë e aplikimit, deri ku kanë arritur ta aplikojnë mësuesit e shkollës, si përkthehet në rezultate tek nxënësit, çfarë dhe si duhet punuar më mire dhe më e mira duke konkretizuar vetë etj.

Koordinatori i cilësisë mund ta zhvillojë punën e tij me gjithë mësuesit e shkollës, në grupe mësuesish sipas nevojave specifike por edhe duke biseduar individualisht me mësues por me mirëkuptimin e palëve për të gjetur kohën e përshtatshme. 

Koordinatori i cilësisë duhet të jetë dhe ta ndjejë veten i mirëpritur tek mësuesit dhe jo t’u imponohet me detyrën që i është ngarkuar. Suksese për të gjithë koordinatorët e cilësisë dhe me sa më shumë arritje cilësore në shkollat tona. 

Portali Shkollor- Të gjitha të drejtat e rezervuara. Ndalohet kopjimi pa lejen tonë.