Aktivitet letrar në bibliotekën e Korçës, e ftuar shkrimtarja dhe botuesja Rita Petro/ Albas dhuron një përzgjedhje të pasur të botimeve për fëmijë

Në bibliotekën “Thimi Mitko” në Korçë u zhvillua një aktivitet letrar me të pranishëm nxënës të shkollave “Tefta Tashko Koço”, “Sevasti Qiriazi” dhe “Mesonjetorja e Parë Shqipe”, të cilët u takuan nga afër me botuesen e shkrimtaren Rita Petro për të bashkëbiseduar mbi magjinë e librave këto prag festash.

Festat e fundvitit po afrojnë dhe një nga mënyrat më të bukura për t’i pritur ato janë edhe takimet për të bërë udhëtime imagjinare e magjike në botën e librave. Sidomos për lexuesit e vegjël.

Nisur nga kjo, në bibliotekën publike "Thimi Mitko", Korçë, u zhvillua një aktivitet letrar me të pranishëm nxënës e mësues të tri shkollave “Tefta Tashko Koço”, “Sevasti Qiriazi” dhe “Mesonjetorja e Parë Shqipe”, të cilët u takuan nga afër për të bashkëbiseduar mbi rëndësinë dhe magjinë e librave me botuesen e shkrimtaren Rita Petro.

Në këtë aktivitet u ndanë dhe u dhuruan një përzgjedhje e pasur e botimeve të Albas për fëmijë.

Përmes kolanës "Me Quajnë...", fëmijët jo vetëm eksploruan botën e personaliteteve kulturore shqiptare dhe të huaj, por lexuan pjesë nga disa prej personaliteteve shqiptarë, midis tyre edhe sopranoja korçare Tefta Tashko Koço. Mes librave që u njohën fëmijët e që do t’i kenë në duar ishte edhe kolana e Klasikëve Botërore të përkthyera nga origjinali dhe të pasura me ilustrime, historitë e të cilave kanë një ndikim të paimagjinueshëm në letërsinë botërore. Por edhe kolana e letërsisë për fëmijë nga Bedri Dedja botime të reja dhe ribotime. Fëmijët janë të ftuar të zhyten në botën magjike të letërsisë për fëmijë nga Bedri Dedja. Librat e tij sjellin përralla dhe aventura që nxisin shpirtin e imagjinatës tek lexuesit më të vegjël. Nuk munguan edhe pyetjet e pafund që fëmijët i drejtonin gjithë kërshëri autores së ftuar.

“Një ditë magjike në ambientet e Bibliotekës Publike ‘Thimi Mitko’ mbushur me kreativitet, kultivim artistik të dijes dhe kultivimin e identitetit kombëtar. Një festë letrare plot ngjyra, ku fëmijët zbuluan pasionin për librat duke krijuar ekuacione të pashtershme të fantazisë, ndihmuar nga Drejtoresha e Shtëpisë Botuese Albas Rita Petro, e cila i udhëhoqi fëmijët në një udhëtim magjik të fjalës dhe imazhit. Me kërshërinë e tyre për dije, fëmijët shtrinë duart e tyre si shenjë e pafundësisë së pyetjeve. Botuesja me shumë dashuri, i udhëzon ata në udhëtimin e zbulimit të njohurive, duke lejuar çdo pyetje të çojë drejt njohurive të reja dhe aventurave të paeksploruara”, kështu është shprehur për këtë aktivitet drejtoresha e bibiolekës, Jorida Tollkuçi.

“Ishte një aktivitet që më mallëngjeu jashtë mase për ata fëmijë të bukur e të mençur plot etje për të njohur jetën e personaliteteve shqiptare nëpërmjet serisë: ‘Më quajnë’; ata i vlerësonin aq shumë veprat e klasikut për fëmijë Bedri Dedja; secili fëmijë lexoi fragmente nga librat që pëlqente më shumë, bashkëbiseduam aq bukur së bashku për dashurinë ndaj librit. Mjedisi që u krijua në bibliotekë falë drejtoreshës, Jorida Dhembi Tollkuçi, ishte aq i ngrohtë dhe miqësor, por falë edhe mësueseve të mrekullueshme që i nxitnin nxënësit të ishin aq të sinqertë e të lirshëm në pyetjet dhe mendimet që shprehnin”, - ka pohuar kështu botuesja dhe shkrimtarja Rita Petro.

Nxënësit nga shkolla 9-vjeçare “Sevasti Qiriazi” dhe mësuesja e tyre Valbona Janaqi

Nxënësit nga shkolla “Tefta Tashko Koço” me mësueset Juliana Athanas dhe Sofika Papa

Nxënësit nga shkolla 9-vjeçare “Mesonjetorja e Parë Shqipe” dhe mësuesja Edmira Xhengo

Libri “Legjenda dhe vende” e shumë botime të tjera të sipërpërmendura nga Albas do të vihen tashmë në dispozicion për fëmijët e qytetit të Korçës, që mund t’i tërheqin në bibliotekën publike "Thimi Mitko".

Kaltra Tafani